ኢትዮጵያ በ2026 የዓለም ምርጥ 50 የምግብ መዳረሻዎች ዝርዝር ውስጥ ተካተተች
ኢትዮጵያ በ2026 የትራቭል ኤንድ ቱር ወርልድ (TTW) የዓለም ምርጥ የምግብ መዳረሻዎች ዝርዝር ውስጥ 37ኛ ደረጃን የያዘች ሲሆን፥ ይህ እውቅና የተሰጣት በባህላዊ ምግቦቿ፣ በቡና ባህሏና በምግብ አዘገጃጀት ቅርሷ የተነሳ ነው። ይህም በምርጥ 50 ዝርዝር ውስጥ የተካተተች ብቸኛዋ የምሥራቅ አፍሪካ አገር እንድትሆን አድርጓታል።
በ2018 ዓ.ም. የዓለም ምርጥ 50 የምግብ መዳረሻዎችን ይፋ ባደረገው የትራቭል ኤንድ ቱር ወርልድ(TTW) ዓመታዊ ደረጃ መሠረት፥ ኢትዮጵያ በ37ኛ ደረጃ ላይ መቀመጧን ብር ሜትሪክስ ዘግቧል። ተቋሙ ለዚህ ደረጃ ያበቃት የአገሪቱን ባህላዊ ምግቦች፣ የቡና ባህልና ጥንታዊ የከሊነሪ (የምግብ አዘገጃጀት) ቅርሶችን መሠረት በማድረግ እንደሆነ ገልጿል።
በዚህ ዓለም አቀፍ ደረጃ ሜክሲኮ አንደኛ ደረጃን ስትይዝ፥ ጣሊያንና ስፔን ሁለተኛና ሦስተኛ፣ ጃፓንና ሕንድ ደግሞ አራተኛና አምስተኛ ደረጃን ይዘዋል። ተቋሙ ደረጃውን ያወጣው የምግብ አዘገጃጀት ባህል፣ የምግብ ዓይነት ብዛት፣ የአካባቢው የቅመም ግብዓቶች፣ የክትፎና የቡና ሥነ-ሥርዓት ባህል፣ እንዲሁም የጎብኚዎችን ልምድና የምግቦቹን መነሻ እውነተኛነት መለኪያ በማድረግ እንደሆነ አስታውቋል።
የተቋሙ ዘገባ የኢትዮጵያን የዘመናት የምግብ አዘገጃጀት ባህል፣ በቅመማ ቅመም የበለጸጉ ምግቦችንና ባህላዊ የቡና አፈላል ሥነ-ሥርዓትን የአገሪቱ የምግብ ባህል ዋነኛ መገለጫዎች አድርጎ ጠቅሷቸዋል።
በደረጃው መሠረት ዋና ከተማዋ አዲስ አበባ ዋነኛ የምግብ መዳረሻ ተብላ የተጠቀሰች ሲሆን፥ እንደ እንጀራ፣ ዶሮ ወጥ፣ ክትፎ እና ባህላዊ የቡና ሥነ-ሥርዓት ያሉ ታዋቂ ምግቦችና ልምዶች በዋነኝነት ተነስተዋል። በተጨማሪም እንደ ላሊበላ የባህልና የጾም ምግቦች፣ የጎንደር ታሪካዊና ንጉሣዊ የምግብ አዘገጃጀቶች፣ የባሕር ዳር የዓሣ ምግቦች፣ የሐረር ቅመማ ቅመም የበዛባቸው ምግቦችና ጣፋጮች፣ እንዲሁም የጅማ የቡና ቅርስ በልዩ ሁኔታ በዘገባው ተካተዋል።
በአፍሪካ ደረጃ ኢትዮጵያ ከሞሮኮ (20ኛ)፣ ደቡብ አፍሪካ (29ኛ) እና ግብፅ (36ኛ) በመቀጠል አራተኛ ደረጃ ላይ የተቀመጠች ሲሆን፥ በምሥራቅ አፍሪካ ቀጠና ደግሞ በምርጥ 50 ዝርዝር ውስጥ የተካተተች ብቸኛ አገር መሆን ችላለች።
ራቭል ኤንድ ቱር ወርልድ በ2018 ዓ.ም. ያወጣው ይህ ደረጃ በአዘጋጆቹ ጥናት ላይ የተመሠረተ ሲሆን፥ የምግብ ቅርስን፣ የአካባቢ ባህላዊ ብዝሃነትን፣ የተፈጥሮ ጥበቃን፣ ለአካባቢው ምርቶች የሚሰጠውን ቅድሚያና የቱሪስቶችን አስተያየት መነሻ ያደረገ መሆኑ ተገልጿል።