በአሜሪካ በአንድ ቀን በሦስት ግዛቶች የሞት ቅጣት ተፈጸመ

በአሜሪካ አላባማ ግዛት ካማሪ ሆላንድ የተባለች የ5 ዓመት ሕጻን ልጅ ላይ የግብረ ሥጋ ድፍረት ፈጽሞ ሕይወቷን በማጥፋቱ የተፈረደበት የ42 ዓመቱ ጄረሚ ትሬማይን ዊሊያምስ ባለፈው ሳምንት በሞት መቀጣቱን @tikvahethiopia ዘግቧል። ሕፃኗ ካማሪ በ2021 ከጆርጂያ ኮሎምበስ ከተማ ከቤቷ ከጠፋች በኋላ የተጀመረው ምርመራ ወደ አላባማ ፊኒክስ ሲቲ ተስፋፍቶ ነበር። ፖሊስ በዊሊያምስ መኖሪያ ቤት ባደረገው ፍተሻ የሕፃኗን ዕቃዎች ያገኘ ሲሆን፣ በመጨረሻም አስክሬኗ ከሕንፃው ምድር ቤት ተገኝቷል።

በምርመራው ሂደት መሠረት ሕፃኗ ከመገደሏ በፊት ታስራ የግብረ ሥጋ ድፍረት እንደተፈጸመባትና በመጨረሻም በመታነቅ ሕይወቷን እንዳጣች ተረጋግጧል። በዊሊያምስ የግል ስልክ ላይም ጥቃቱን የሚያሳዩ የቪዲዮ ማስረጃዎች መገኘታቸው በፍርድ ሂደቱ ላይ ይፋ ተደርጓል። ዊሊያምስ እ.ኤ.አ በ2024 የሞት ፍርድ የተፈረደበት ሲሆን፣ ጥፋተኛነቱን አምኖ የይግባኝ ሂደቶችን ለመተው በመምረጡ የሞት ፍርዱ እንዲፋጠን አድርጓል። በዚህም መሠረት ባለፈው ሳምንት ሐሙስ ዕለት በገዳይ መድኃኒት መርፌ ተገድሏል። የአላባማ ጠቅላይ አቃቤ ሕግ ቢሮ እንደገለጸው፣ ዊሊያምስ ከዚህ በፊትም በሌሎች ሕፃናት ላይ ተመሳሳይ የፆታ ጥቃት መፈጸሙን አምኗል።

የዊሊያምስ ግድያ በተፈጸመበት በዚያው ሐሙስ ዕለት በኦክላሆማ እና ቴነሲ ግዛቶችም ሌሎች ሁለት የሞት ፍርዶች ተፈጽመዋል። በኦክላሆማ ግዛት የ70 ዓመቱ ካርሎስ ኩዌስታ-ሮድሪጌዝ እ.ኤ.አ በ2003 ባለቤቱን ኦሊምፒያ ፊሸርን በመግደሉ ተፈርዶበት፣ ከ20 ዓመታት በላይ በእስር ከቆየ በኋላ በሞት ተቀጥቷል። በቴነሲ ደግሞ የ66 ዓመቱ አንቶኒ ዳረል ሂንስ እ.ኤ.አ በ1985 ካትሪን ጄንኪንሰን የተባለች የ54 ዓመት የሞቴል ሠራተኛ በመግደሉ ወንጀል ተከሶ፣ ከ40 ዓመታት እስር በኋላ የሞት ቅጣቱ ተፈጽሞበታል።

በአሜሪካ ኦክላሆማ፣ ቴነሲ እና አላባማ ግዛቶች በአንድ ቀን ውስጥ ሦስት የሞት ቅጣቶችን መፈጸማቸው ከረጅም ዓመታት በኋላ የታየ ክስተት ሆኗል። ለመጨረሻ ጊዜ ሦስት የአሜሪካ ግዛቶች በአንድ ቀን የሞት ቅጣት የፈጸሙት ታህሳስ 29 ቀን 2002 ዓ.ም. ነው። ሦስቱ የሞት ቅጣቶች በየግዛቶቻቸው በተናጠል የተወሰኑ እንጂ አስቀድሞ ተቀናጅተው በአንድ ላይ እንዲፈጸሙ የተደረጉ አለመሆናቸውም ተገልጿል።