ከ250 ቀናት በላይ በባሕር ላይ በቆዩት የአሜሪካ የጦር መርከቦች ላይ ያለው አስከፊ ሁኔታ ስጋት ፈጠረ

ከ250 ቀናት በላይ በባሕር ላይ በቆዩ የአሜሪካ የጦር መርከቦች ላይ የሚገኙ በሺዎች የሚቆጠሩ የአሜሪካ ጦር አባላት የምግብ እጥረት፣ የቁሳቁስ መበላሸት እና ከፍተኛ የአእምሮ ዝለት እየገጠማቸው መሆኑን ቢቢሲ ዘግቧል። ይህንን ተከትሎም የአሜሪካ ሕግ አውጪዎች ፔንታጎን በአስቸኳይ ምላሽ እንዲሰጣቸው እንዲሁም የትራምፕ አስተዳደር ከኢራን ጋር ያለውን ግጭት እንዲያጠናቅቅ ጫና እያደረጉ ይገኛሉ።

ወታደራዊ ጉዳዮችን የሚዘግቡ የዜና አውታሮች እንደገለጹት፣ በዩኤስኤስ አብራሃም ሊንከን የጦር መርከብ ላይ የሚገኙ አንዳንድ መርከበኞች በደረሰባቸው ከባድ የስነ-ልቦና ጫና ወደ ውቅያኖስ ለመዝለል ሞክረዋል። የመርከበኞቹ ቤተሰቦችም በአእምሮ ጤናቸው ላይ ከፍተኛ ስጋት እንዳላቸው ገልጸዋል። የመከላከያ ሚኒስትር ፒት ሄግሴት ግን ሐሙስ ዕለት እነዚህ ሪፖርቶች "ሁኔታውን ሙሉ በሙሉ የሚወክሉ አይደሉም" ሲሉ አጣጥለዋቸዋል።

መርከቧ በኅዳር ወር ከካሊፎርኒያ ወደ ደቡባዊ ቻይና ባህር ያቀናች ሲሆን፣ ከኢራን ጋር ግጭት ከመጀመሩ በፊት ወደ መካከለኛው ምሥራቅ እንድትዛወር ተደርጓል። በግንቦት ወር ሊጠናቀቅ ታቅዶ የነበረው ተልዕኮ በተደጋጋሚ ተራዝሟል፤ የመመለሻ ቀንም አልተወሰነም። ይሁን እንጂ አሜሪካ መርከቧን በዩኤስኤስ ጆርጅ ዋሽንግተን ለመተካት እየተዘጋጀች መሆኑ ተዘግቧል።

ሴናተር ሪቻርድ ብሉሜንታል ለመከላከያ ሚኒስትሩ በጻፉት ደብዳቤ፣ በመርከቧ ላይ የሚገኙ 5,000 ገደማ ሠራተኞች የሚጋፈጧቸውን ችግሮች ዘርዝረዋል፦ የመሠረታዊ አቅርቦት እጥረት፣ የውሃ ብክለት፣ የቧንቧ መበላሸት፣ የአእምሮ ጤና ቀውስ፣ የመርከቧ ደህንነት ስጋቶች እና ለወራት የፖስታ መስተጓጎል። በሴኔቱ የመከላከያ ኮሚቴ ውስጥ ያሉ ዲሞክራቶች ጉዳዩ አፋጣኝ ትኩረት እንደሚያስፈልገው ገልጸው፣ ባህር ኃይሉ ተልዕኮውን በዚህ ፍጥነት ማስቀጠል ስለመቻሉ ጠይቀዋል።

ሴናተር ሩበን ጋሌጎ የኮንግረስ ልዑክ መርከቧን በአካል ጎብኝቶ ክትትልና ምርመራ እንዲያደርግ ጠይቀዋል፤ በኤክስ ገጻቸው ላይ "የምንከለከልበት ምንም ዓይነት ምክንያት የለም" ሲሉ ጽፈዋል።

የቢቢሲ አጋር የሆነው ሲቢኤስ ኒውስ በዚህ ወር መጀመሪያ እንደዘገበው፣ ከመርከቧ ለመዝለል የሞከረ አንድ መርከበኛ ወደ ሕክምና ተቋም ተወስዶ የአእምሮ ጤና ክትትል እየተደረገለት ይገኛል። ሚልታሪ ታይምስ እና ስታርስ ኤንድ ስትራይፕስም እንደዘገቡት፣ በርካታ ወታደሮች በረጅም ቆይታና በአሰቃቂ የመኖሪያ ሁኔታ ምክንያት ከመርከቡ ለመዝለል ማሰባቸውን ለቤተሰቦቻቸው ተናግረዋል፤ ከአንድ ሳምንት በላይ ልብስ ማጠብ አለመቻል፣ ትኩስ ምግብ ማጣትና የወደብ ጉብኝት መከልከልም ከአቤቱታዎቻቸው መካከል ናቸው።

የአንድ መርከበኛ ቤተሰብ ለቢቢሲ እንደገለጹት፣ ዘመዳቸው መርከቧ ላይ ከተመደበ ወዲህ 29 ኪሎ ግራም ቀንሷል። ስማቸው እንዳይጠቀስ የጠየቁት እኚህ ሰው፣ መርከበኛው በቅርቡ በላከው መልእክት "ደክሞኛል። እስከ ሞት ድረስ ነው የዛልኩት" ማለቱን ተናግረዋል፤ ከሞተርና ከአውሮፕላን እንቅስቃሴ የሚወጣው ማያቋርጥ ንዝረትም ለአእምሮ እረፍት ቦታ እንደማይሰጥ ገልጸዋል።

"ተልዕኮውን ይረዳል፣ ነገር ግን ይህ መኖር የሚቻልበት አካባቢ እንዳልሆነ ያውቃል" ብለዋል። "እረፍት አልሄደም፤ ግዴታውን ያውቃል። ነገር ግን ያለ ወደብ ጉብኝት፣ መሬት ሳይረግጡ እና ያለ እረፍት መቀጠል ከባድ ነው። ጠዋት፣ ቀትርና ማታ—ስትተኛ፣ ስትበላ ወይም ስትታጠብ ያ ንዝረት ይሰማሃል። ሰላም የለም።"

የካሊፎርኒያ ተወካይ ማይክ ሌቪን በኤክስ ገጻቸው ላይ "ሻጋታ የያዛቸው ሻወሮች፣ የተበላሹ መጸዳጃ ቤቶች፣ ለሳምንታት ያልተስተካከሉ የልብስ ማጠቢያዎች፣ ያለ ትኩስ ውሃ ረጅም ጊዜ፣ በግማሽ ኩባያ ሩዝና በሁለት ቶርቲላ መኖር፣ እንዲሁም ሳሙናና የጥርስ ሳሙና እጥረት" ብለው ዘርዝረዋል።

በጥር 2017 ዓ/ም በ956 የባሕር ኃይል አባላት ላይ የተደረገ ጥናት እንደሚያሳየው፣ ብዙዎቹ በአስከፊ የመኖሪያ ሁኔታ፣ በጩኸትና ለእረፍት በቂ ጊዜ በማይሰጥ አድካሚ ሥራ ምክንያት ለከባድ የሥነ-ልቦና ጭንቀት ተጋልጠዋል። በባሕር ኃይሉ ውስጥ ራስን የማጥፋት መጠንም አሁንም አሳሳቢ ሆኖ ቀጥሏል።