በኢትዮጵያ አየር መንገድ ቦይንግ 737 ማክስ አደጋ ለሞቱት የተመድ ሠራተኛ ቤተሰቦች የ29 ሚሊዮን ዶላር ካሳ ተወሰነ

በብር ሜትሪክስ ዘገባ መሠረት የቺካጎ ፍርድ ቤት በ2011 ዓ.ም. በደረሰው የኢትዮጵያ አየር መንገድ ቦይንግ 737 ማክስ አውሮፕላን አደጋ ሕይወታቸውን ላጡት አይሪሽ ተወላጅ የተባበሩት መንግሥታት ድርጅት (ተመድ) ባልደረባ ቤተሰቦች የ29 ሚሊዮን የአሜሪካ ዶላር የካሳ ክፍያ እንዲፈጸም ወስኗል።

ይህ የፍትሐ ብሔር ክስ በቦይንግ ኩባንያ ላይ የቀረበው የ39 ዓመቱ የተመድ የዓለም የምግብ ፕሮግራም (WFP) መሐንዲስ የነበሩትና በኢትዮጵያ በደረሰው አደጋ ሕይወታቸውን ካጡት 157 ሰዎች መካከል አንዱ በሆኑት በማይክል "ሚክ" ራያን ባለቤት ናኦይስ ኮኖሊ ራያን አማካኝነት ነው።

ሚክ ራያን በላይቤሪያ የተከሰተውን የኢቦላ ወረርሽኝ መከላከልና የሮሂንጋ ስደተኞችን መርዳትን ጨምሮ በበርካታ ዓለም አቀፍ የሰብዓዊ ዕርዳታ ሥራዎች ላይ በንቃት ተሳትፈዋል። የተባበሩት መንግሥታት ድርጅት ባዘጋጀው የመታሰቢያ ሥነ ሥርዓት ላይም በአፍጋኒስታን፣ በስሪ ላንካ፣ በኔፓል እና በኢትዮጵያ ላበረከቱት ከፍተኛ የሰብዓዊ አገልግሎት ዕውቅና ተሰጥቷቸዋል።

ይህ የዳኞች ውሳኔ በ2010 እና 2011 ዓ.ም. በድምሩ የ346 ሰዎችን ሕይወት በበሉ ሁለት ተከታታይ የ737 ማክስ አውሮፕላን አደጋዎች ምክንያት በቦይንግ ላይ ከተመሠረቱት የመጨረሻዎቹ የፍትሐ ብሔር ክሶች መካከል አንዱ ነው።

ከአደጋዎቹ ጋር በተያያዘ የተነሱ አብዛኞቹ ክሶች ከፍርድ ቤት ውጭ በሚስጥር በተደረጉ የገንዘብ ስምምነቶች የተፈቱ ቢሆንም፣ የራያን ጠበቃ ስቲቨን ማርክስ ቀደም ሲል እንደገለጹት፣ ደንበኛቸው ከቦይንግ የሚቀርብን ቀጥተኛ የክፍያ ስምምነት ከመቀበል ይልቅ ጉዳዩን በዳኞች ፊት መከራከር መርጠዋል።

ቦይንግ ላጋጠሙት አደጋዎች ይቅርታ የጠየቀ ሲሆን የአውሮፕላኑ የመውደቂያ መከላከያ ሶፍትዌር (anti-stall software) በሁለቱም ክስተቶች ውስጥ ድርሻ እንደነበረው አምኗል። ኩባንያው ረቡዕ ዕለት በተላለፈው በዚህ አዲስ ውሳኔ ላይ አስተያየት እንዲሰጥ ለቀረበለት ጥያቄ ወዲያውኑ ምላሽ አልሰጠም።

ይህ የቺካጎ ፍርድ ቤት ውሳኔ ከዚሁ የኢትዮጵያ አየር መንገድ አደጋ ጋር በተያያዘ ቀደም ሲል ከተሰጠ ሌላ ተመሳሳይ ብይን በመቀጠል የመጣ ነው። ባለፈው ግንቦት ወር በተመሳሳይ ፍርድ ቤት በዚሁ አደጋ ሕይወቷ ላለፈው የ24 ዓመቷ አሜሪካዊት ተሳፋሪ ሳምያ ስቱሞ ቤተሰቦች የ49.5 ሚሊዮን የአሜሪካ ዶላር ካሳ እንዲከፈል መወሰኑ ይታወሳል።